Хүнс, хөдөө аж ахуй, хөнгөн үйлдвэрийн сайд Ч.Улаан ОХУ-д хийж буй ажлын айлчлалынхаа үеэр Москва мужийн “Московский конный завод №1” адуу үржүүлгийн аж ахуй, “Наро-Осановский” сүүний аж ахуйд тус тус зочиллоо.
“Московский конный завод” үржүүлгийн газрын ерөнхий захирал Ю.Б.Прохоров төлөөлөгчдийг үржүүлгийн газрын үйл ажиллагаа, барилга байгууламжтай танилцуулж, өөрсдийн үржүүлж буй зарим цэвэр цусны адууг үзүүлж сонирхуулав.
“Московский конный завод №1” адуу үржүүлгийн газар анх 1924 онд байгуулагдсан бөгөөд Москва мужийн хамгийн том, цэвэр үүлдрийн адуу үржүүлгийн газар юм. Тус үржүүлгийн газарт Орлов, Орос болон Тракенен үүлдрийн адууг үржүүлэхээс гадна жилийн дөрвөн улиралд морь сонирхогчдын морьдыг чүчээний болон тордох үйлчилгээ үзүүлдэг байна. Түүнээс гадна хүүхэд багачуудыг багаас нь адуунд элэгтэй, морь унах, асрах ур чадвар эзэмшүүлэх зорилгоор төлбөргүй дугуйлан хичээллүүлдэг аж.
Үүний дараа “Наро-Осановский” сүүний аж ахуйд зочлов. Тус сүүний аж ахуй нь өөрийн эзэмшлийн 4000 га газарт үнээний ферм, сүү, сүүн бүтээгдэхүүний цех, хүнсний ногоо болон малын тэжээл тарих зэрэг үйл ажиллагаа эрхэлдэг байна. Үнээний ферм нь өдөрт 60 тонн сүү гаргаж авах хүчин чадалтай аж. Түүнээс гадна сүүнийхээ тодорхой хэсгийг боловсруулан өдөрт 10 тонн тараг, цөцгий, зөөхий, бяслаг зэрэг сүүн бүтээгдэхүүнийг үйлдвэрлэж Москва мужийн хэрэглэгчдийн хэрэгцээнд нийлүүлдэг.
Ч.Улаан сайд ОХУ-ын Хөдөө аж ахуйн сайд Д.Н.Патрушевтэй хийсэн уулзалтаар Монголын малыг эрүүлжүүлэх хөтөлбөрийн гуравдугаар шатыг хэрэгжүүлэх, ОХУ-д мах, махан бүтээгдэхүүний нийлүүлэлтийн хэмжээг нэмэгдүүлэх анхаарч дэмжихийг хүслээ.
ОХУ-аас цэвэр үүлдрийн мал нийлүүлэх, малын удмын санг хамгаалах чиглэлээр хамтран ажиллах, манай улсын “Газар тариалангийн техникийн шинэчлэл” төслийг үргэлжлүүлэх, ОХУ руу хөдөө аж ахуйн салбарын бараа бүтээгдэхүүний экспортыг нэмэгдүүлэх зэрэг тодорхой асуудлаар нэгдсэн ойлголтод хүрсэн байна.
Түүнчлэн айлчлалын үеэр Мал, эмнэлгийн Ерөнхий газрын дарга Д.Түмэндэмбэрэл “ОХУ-ын Бүх холбоотын мал амьтны эрүүл мэндийн төв”-өөс мал амьтны гоц халдварт өвчнөөс урьдчилан сэргийлэх вакциныг худалдан авах гэрээ байгуулав.
